خلاص تميت ال 28 الرقم مش صغير على فكره ولو قلت غير كدا يبقى هضحك عليك .. 

العمر بيجري والفرص خلاص تمام تنعدم ولسه مصمم على موقفك برده .. عايز تقضي السنه دي كمان من غيري !!

كل مره كنت بديك عذر بس المره دي أنا مش عارفه ألأقي أي عذر لأنك مش ترجع من تاني .. 

لسه مش عايز تتحرك وبتتنازل عن حقوقك وشايف أنك كدا صح وفاهم أنه هتقدر تتحمل نتيجه أختيارك طب قولي هتقدر تتحمل أنه ربنا يخليك مع حد مش باقي عليك ولا شاريك ولا فارق معاه عشان فرطت في اللي كان شاريك وباقي عليك وبيحبك .. 

طب عايز تكون الشخص اللي أتعود على الغربه وعايش طول عمره لوحده وأنت عارف الشخص دا بيكون عامل أزاي في المستقبل شخص عملي روتيني مش بيقتنع بالمشاعر ولا بالحب ..

لسه عايز تشوف أنه كل الناس وحشه ومش يعتمد عليها ولا ينفع تثق فيهم .. طب أنا كنت ايه !!

خذلتك مثلاً أو سبتك في نص الطريق دا أنا عملت عشانك مخصوص حاجات كتيره جدا  كله عشان بحبك وعشان شرياك مش شايف أنه دا سبب كافي نكون مع بعض .. هتقول بحميكي تبقى غلطان .. النفع الضر بأيد ربنا وحده وهو يقرر يحصلنا ايه  هو اللي قادر يحمينا

هتقول مش عايز مشاكل ومين عايز أصلا مشاكل ولا بيدور عليها بس حياتك وحقوقك مش ينفع تتنازل عنها وتقول هتحمل نتيجه قراري لوحدي ..
هتتحمل تكون لوحدك من غير حد فاهمك حافظك شاريك .. دا الواحد يبيع الدنيا كلها عشان شخص شاريه تقوم أنت تعمل العكس ..
أنا أترجيتك ترجع الشخص اللي حبيته وعرفته زمان بس الظاهر أنك مش عايز وحابب توبك الجديد توب القسوه والقوه بس أحب أقولك أنت غلطان وبكره والله العظيم لتندم الحنيه والحضن من حد بتحبه والأمان دا أحلى شعور تحسه ومش بيشتري بالمال ولا موجود في بلاد أوروبا ولا في السفر والصحاب والجري والتنطيط موجود في حاجه واحده بس في شريكه حياه تكون سندك وضهرك ودا كلام ربنا مش كلامي لما قال : " خلق لكم من أنفسكم أزواجاً وجعل بينكم موده ورحمه " الموده والرحمه موجوده في الأزواج .. 

معليش كلامي شديد وقاسي في يوم ميلادك ومش عايزاك تزعل بس من حبي كان لازم كلامي يكون قاسي عشان تفوق عشان عايزين نكون سوا .. 

ولو أنت شايف فيه خمسه سته مش عايزنا نكون سوا ف فيه قصادهم ١٠٠ واحد عايز نتجمع ونكون مع بعض وعايزين يساعدونا بس الخطوه الاولى لازم تيجي منك لازم تبقى ثابت على موقفنا وتقدم فيه خطوات والباقي على ربنا مش هقولك الناس لا على ربنا .. و ما اتوقعش يعني هيقفوا قدام سعادتك و راحتك خصوصا لما تسيب المواقف الجايه والزمن يظهر الأمور اللي داخله في بعض وعامله مشاكل أفتكر الايام اللي القديمه ازاي كانت العيلتين كويسين مع بعض قادر ربنا يرجعهم كدا و احسن كمان سيدنا عمر بن الخطاب كان رايح يقتل الرسول دلوقتي مدفون جنبه..

مش عايزاك تحرم نفسك من اللي بتحبه اخواتك كل واحد هيتجوز ويكمل حياته مع اللي بيحبه يبقى اشمعنا انت عايز تحرم نفسك لمجرد اسباب مش اسباب

هتقدر تتحمل نتيجه قراراتك لما بعد كام سنه كل واحد شايل ولاده وانت لا او عندك ولاد بس مش مبسوط في حياتك عشان قلبك في حته تانيه .. واللي بيتاخد بالغصب عمره ما بيتنسي و لو فاكر هتنسى لا هيجي عليك اليوم اللي كل حاجه تفكرك بيه ..

دا كان الجزء القاسي من كلامي

الجزء الحنين اللي جوايا انه كل سنه وانت سالم مش عارفه اعدلك عشر حاجات اقولهالك زي ما بعمل كل سنه واديك هديتك والله العظيم جيباها مخصوص ليك استعملتها مرتين بس كنت واحشني اوي ف رشيت منها عشان احس انك جنبي مش معنى كدا انك وحشتني مرتين لا لا انت طول الوقت 

واحشني

ودي الاصليه على فكره معليش المره اللي فاتت مش قدرت اجيب الاصليه لو كنت اقدر كنت جبتها انت مش يغلى عليك حاجه أبدا وزمان كنت بجيبلك من مصروفي مخصوص دلوقتي عايزة اجيبلك كل حاجه حلوه وغاليه عشان خاطرك وخاطر عينك اللي وحشتني والله ووحشتني ضحكتك أوي بالله عليك لترجع والله اي حاجه تهون طول ما احنا سوا دا انا هحطك في عيني ومش هزعلك ابدا عارف لما بقعد اتكلم وادعي ربنا اقوله والله يا رب م في عيني واوعدك احافظ عليه ومش ازعله ابدا تعال خلاص كفايه بُعد نفسي تيجي اللحظه اللي امسك ايدك فيها واشوفها حلوه ولا لا بس انا واثقه انها اكيد حلوه وحضنك اكيد احلى واحن حاجه في الدنيا يا رب يا شيخ تيجي وترجع تاني ونكون المره دي لبعض دانا عندي ليك شويه اخبار هتعجبك اوي واتعلمت حاجات هتبسطك 😂😂

وحشتني ووحشني وانا برخم عليك وطمطم كل شويه تعيط وتقولي بابا جاي أمته وانا قلتلها قريب ان شاء الله بابا مش هيتخلى عنا  ابدا دا هو اللي قايلي كدا هو بس باابا مجروح  واتذى جامد اوي ولازم يا طمطم نعوضه عن كل دا لما يرجعلنا تاني فتعال عشان طمطم مش تعيط طول الليل والله بقالها سنتين بتعيط عشانك بليل دي طمطم مش انا على فكره اللي بتعيط .. 

بكتب الكلام دا يمكن تقرأه ويرجع تاني ليا سدد وقارب يا م قرب الطرفين ما تخسرش أي كله في الميزان الموضوع صعب معليش بس والله يستحق ويستاهل وأنا أوعدك سعادتي هتكون هدف حياتي الأول وهعوضك عن كل حاجه وتعوضني أنت كمان لأني فعلاً تعبت وهنقرب الكل من بعضه وهنكون أحسن من الأول والله ❤❤ 

كان نفسي أغنيلك أو أشغلك أغنيه زي قبل كدا أغنيه " عشانك " لأنها عجبتك أوي وحسيتك يومها كنت سعيد وأغاني كتير أوي 

عايزة أغنيهالك

يوم ‏مولدك ‏٢

فاضل أسبوع على يوم ميلادك 😊😍 

يا ترى فيه حد عمال يعد الأيام كدا زيي ليك !! 

ما أتوقعش عشان مافيش حد حاطك في قلبه وعقله زيي .. 

عندي كلام كتير أوي ليك .. نفسي ترجع تاني زي الأول 

عارف كنت بقعد أتخيل أنه بعد آخر كلام بينا هتفكر فيه وترجع اللي حبيته تاني وتحصل حاجه الأمور تتعدل بيها .. 

وكنت بتخيل اللحظه اللي هروحلك المطار وأنه أستأذنت الكل أنه أروح لوحدي أجيبك وفعلاً من بدري رحت على غير عادتي أنه دايماً بتأخر بس أنت واحشني أوي فكرت أجيبلك ورد وأتكسفت فقلت بلاش .. رحت وكنت عماله أدور في كل الناس اللي طالعه وأول ما طلعت شفتك من بعيد وكل ما تقرب كل ما عيني تبعد عنك عشان مكسوفه ابصلك .. تخيل بعد كل دا لسه بتكسف منك .. 

ولما جيت قربت وقلتلي ايه!! 

فأنا ضحكت وكنت مكسوفه خالص ووشي أحمر وأتحريت وقلتلك حمد الله على السلامه يا م .. 

قلتلي طب ايه برده مش هتبصيلي قلتلك لا رحت موطي وشك عشان تشوفني ورحت مديره خالص وكان معاك مخده صغيره أخدتها منك وحضنتها جامد وقلتلك تخيل الحضن دا ليك مؤقتاً لحد ما ينفع وأحضنك وقتها ❤❤ وفضلنا ماشيين مش مصدقين نفسنا وعمالين نتكلم ووصلنا تحت بيتك وأنت مش راضي تطلع وقلتلك لازم تطلع عشان ما حدش يقلق وتريح وبالعافيه طلعت وانا روحت ولقيك بتتصل وعمالين نتكلم في الموبيل لحد ما فجأه زي ما بتعمل معايا نمت وسبتني  .. قفلت المكالمه وفضلت اعد الساعات عشان تصحى .. ولما صحيت جيت البيت وكانت المقابله هنا حلوه أوي .. طول عمري بكون مبسوطه لما بلاقيهم عندي مبسوطين بيك حتى لما كانوا يعملوا حاجات مخصوص عشانك كنت بفرح ومش بغير على غير عادتي ... 

وتخيلت الأيام ونزولنا كل يوم ولا فيه مذاكره ولا أي حاجه تعيقنا زي زمان وأحنا عمالين نستعد ونجهز حاجتنا .. كلها تخيلات حلوه وسعيدة تخيلات حقيقيه وفيها روح لأنك مع حد بتحبه .. 

ما وحكش خروجنا وأيامنا .. بالله عليك مش كانت أحلى من اللي بتعمله دلوقتي أين كان بتعمل ايه وبتروح فين !! 

لسه برده قلبك ما حنش ولا عايز ترجع ... دا أنت واحشني أوي أوي وكل شويه عمال تبعدني عنك وأقول الصبر .. مصيره يغير قراره دا بيحبني وكل حاجه هتتصلح ..

مش عارفه ليه مصمم انه مافيش أمل وأنه الموضوع أتقفل .. أحنا مش عملنا حاجه حرام أو غلط يعني عشان نستحق العقاب دا كله ايه يعني شويه تصرفات غلط صدرت مننا ما احنا صغيرين في السن وبنتعلم أيه يعني شويه خلافات الحمد لله أنها تقدر تتحل ولا أنا وحشه أوي لدرجه الرفض اللي أنت عمال تقول مالوش سبب غير أنه لازم يكونوا راضين عن اللي هتكمل حياتك معاها .. طب أنا ايه سبب عدم الرضى يعني لما بنحب بعض ومافيش شكوى شخصيه مني ولو فيه ف هي أمور مش متوضحه صح ومحتاجه قعده تتوضح فيها .. ليه مانع نفسك تختار وتعيش اللي نفسك فيه !! 

خوف عليهم وعشان تعبهم .. طب نفسي أقولك فكر صح وبُص لبعيد أنت عمال تقول كل واحد يتحمل نتيجه أختياره وقراره وأنت قرارك أخدته بناء على أنك خايف عليهم طب واللي حصل دا كان مش ظلم وربنا مش بيرضى بيه وبيحاسب اللي ظلم الناس يبقى لو بتحبهم صح زي ما بتقول يبقى تراجعهم عن قرارهم وتخليهم يغيروه عشان مش تزعل عليهم بعدين لما ربنا ياخد بالحقوق والظلم اللي حصل ..لو عملت كدا وقتها يبقى حبتهم صح خفت عليهم بجد خفت من ربنا وربنا اللي بأيده وقتها كل حاجه حتى تعبهم دا بايده وقادر يشفيهم في أي لحظه ومافيش حد في أيده التعب والشفا إلا هو لا أنت سبب تعبهم ولا أي حد دا قدر ربنا ..

 يا ريتك أدتني الفرصه اللي أوضحلك كل الأمور صح لأني خايفه عليك وبحبك فعلاً .. 

‏أبو بكر لم يُعذّب ك "بلال" ولكنه أفضل منه

ولم ينل الشهادة ك "عُمر" ولكنه أفضل منه

ولم يذق الفقر ك "أبي ذر" ولكنه أفضل منه

ولم يصرع الفرسان ك "خالد" ولكنه أفضل منه

ولم يُحرم بصره ك "ابن أم مكتوم" ولكنه أفضل منه 

أبو بكر درس بليغ مفاده : 

يستطيعُ الإنسان بقلبه أن يسبق الجميع .. ❤

أن يسبق برقه ولين قلبه .. ❤🌸

يا من لا يزال ملكه .. أرحم من زال اليوم ملكه

إن كلمات هذه الجمله هزت قلبى كاد أن يخرج من مكانه 

أذكركم ونفسى .. ولمثل هذا اليوم فاعدوا

كل مواقع التواصل الأجتماعي بتتكلم عن رجاء الجداوي و الجنازه .. 

وأزاي كانت ست شيك جداً ، عاشت عمرها كله بتلبس اغلى و أفخم البراندات ودايما تنتقي كل حاجه فخمه و قيمه .. 

آخر مشهد ليها ملفوفه في حافظه سوده و مكتوب احذر خطر الإصابه بالعدوي  !

وفي آخر مداخله ليها قالت فيها : يا جماعه خلي بالكم .. عايزين نرجع إلى الله .. عايزين نشوف مين بيظلم مين بياكل حق غيره .. ما حدش مملوك من حد مصيرنا في أيد ربنا بس .. 

اقسم بالله مافيش أي حقيقه مطلقه في الدنيا دي غير هوانها و زوالها مسرحيه و بتخلص .. مهما عشنا فيها بفروق ماديه وإجتماعيه، بالعافيه بتخلص بالتساوي  .. وماحدش بياخد معاه في اللحظه دي غير عمله .. 

وفي وسط المواقف اللي أتكتبت عنها .. وأثرت فيا 

إن رجاء حست أن دلال عبد العزيز وحشتها ..قامت رجاء راحت تحت بيت دلال بليل وكلمتها قالتلها انتي وحشاني انا تحت بيتك انزلي عايزة اشوفك ..دلال كانت دخلت سريرها علشان تنام وقالتلها انتي بتهزري ياروجا جاية دلوقتي وفي كورونا ومقدرتش تنزلها.. قامت رجاء خدت بعضها وراحت لبيت ميرفت أمين واتصلت عليها لقيتها تلفونها مقفول .. قامت روحت بيتها ونامت من غيري ما تشوف دي ولا دي وبعدها اكتشفت الإصابة بفيروس كورونا ودخلت العزل وماتت انهاردة .. العبرة من الحكاية اللي روتها بنفسها دلال عبد العزيز تخليك دايما علي يقين أن بكرة ده مش بتاعك ويمكن جداً ميجيش انتهزوا الفرص وعبروا لبعض عن حبكم وكبروا دماغكم من التفاهات واللي ضامن أنه موجود علطول جنبك مهما حصل مش هيبعد في لحظة ممكن يروح ميرجعش .. 

وموقف تاني عن عمرو أديب أتكتب عنه وأتقال ..

 عمرو اديب اكدلى أن لسه ف ناس بيطمر فيهم المعروف و انه بيعترف أنها صاحبه فضل ليه بعد ربنا .. 

كميه الحزن و الوجع اللى ف قلبه و عينه بيأكدلى أن فيه ناس ممكن تحب و تخلص بجد .. لفت نظرى كلمه كانت دايما بتقولهاله ( اللى بيحب حد يديله كل حاجه)

وللاسف احنا ساعات بنستخسر نقول اللى بنحبهم أن احنا فعلا بنحبهم و منقدرش نعيش منغيرهم .. 

الله يرحمها و يغفر لها و يرحمنا إذا سيرنا إلى ما سارت إليه ..

مشاهد دفن وتشيع جثمان رجاء الجداوي نزلت على النت ومش عارفه ايه اللي خلاني أشوفها وأنا عارفه أنه هفضل أيام كتيره المشهد في دماغي بس قلت كفى بالموت واعظاً يمكن عندي ذنوب مش قادره أبطلها ولما أشوف أخرتي هتكون أزاي أتعظ.. 

المشهد صعب مش سهل أنك تدفن حد بتحبه في تراب مشهد مش قادره أتخيله ولا عايزة أعيشه تاني .. وفاه تاتا وأنه أنا اللي عرفت أنها أتوفت لسه محفور في ذاكرتي وفضلت واقفه بطلع تصريح الدفن وبروح الجامع وبشوف على الناس اللي جم وكانت أول مره في حياتي أحضر وفاه وجنازه حد قريب مني ،  فضلت واقفه على رجلي لحد ما خلاص هنصلي الجنازه وقعت فجأه رجلي مش شالتني .. رجلي وقوتي اللي كانت قبل ساعات كويسه وبروحلها يومياً وأجيب دكاتره وأنزل وأطلع سلم ٦ أدوار عشانها كل دا كان ربنا مسخرله ليها أنا الوحيده اللي مش كنت لا مرتبطه بشغل و لا دراسه ودي تاتا من غيري يجري عليها عمري ما هنسها أننا كنا أقرب الأحفاد ليها ماما شبها جداً ، جدتي كانت حته من الجنه ... و وجع فقدها لسه موجود لحد دلوقتي 

واحشني أكلها واحشني نسينها وأستغل دا أنه أخليها ترقيني كذا مره ، أنا لسه فاكره كانت عندنا وكنت أتعرضت لموقف صعب وعيطت بصوت عالي جريت عليا ف الأوضه وكانت عرفاني وقالتلي مالك يا سوسو وفضلت وتطبطب عليا .. لسه فكرالها موقف كنت في مشكله كبيره أوي ومش عارفه هتتحل أزاي وأنا وهي لوحدنا في البيت وكنت بذاكر في أوضتي وقافله عليا وقمت أعملنا شاي حطيته قدامها وقلت أشرب كوبايتي في أوضتي وأكمل مذاكره لقيتها طلبت مني أنه أقعد معاها قعدت وقالتلي أنا عايزاكي تصبري كل حاجه هتتحل بس أنتي أصبري مع أنها ناسيه ومش عارفه المشكله اللي أنا فيها بس قلتلها حاضر .. وقلت أكيد كلمه مش قصداها لكن كملت وقالتلي أنتي لما تتجوزي هتتجوزي فجأه وهنفضل كلنا نجري وراء بعض كدا عشان نلحق قلتلها قولي يا رب يا تاتا وكلامها دا صبرني أوي وقتها قلت دي أكيد رساله من ربنا ... ربنا يرحمها ويرحم كل ميت ❤🌸 

المهم أنه موقف الموت دا لما بتخيل نفسي فيه عايزة حاجه واحده بس أنه كل الناس تكون مسمحاني مش هقدر أقابل ربنا وأنا عليا دين لحد دين معنوي زعلت حد وجعت حد بكلمه وعدت حد بحاجه ومش عملتها ظلمت حد نيمت حد زعلان مني ... أي دين تسبب في وجع حد مني ولو لثانيه واحده ونيمته زعلان أو دموعه على خدي بسببي .. 

نفسي الناس تفضل فكراني ويجوا يزروني ويزوروا ماما وبابا وأخواتي وكل اللي بحبهم ويفتكروا ليا الحاجات الحلوه .. 

اللهم أرحم من سبقونا إلى الدار الآخره وأجعل مثوانا ومثواهم جنات النعيم .. ❤❤

أعظم هبَّة مُمكن يقدمها ربنا ليك ، هي "قلبك الطيب" كونك شخص مُتسامح ده ميقللش منك في شيء، أنك تصفح و تدي عُذر و سبب لفعل إللي قدامك ده ميدلش على ضعف شخصيتك ، لأنك بتتعامل بفطرتك إللي أتخلقت عليها، مش بتتصنع و قلبك مفهوش ذرة سوء و لا كُره لحد، مش مُعقد و بتعقد الأمور و محتاج كل حاجة تكون بمبرر و مبتنساش الغلط لو بعد سنين، عايش الحياة بكل أريحية و سهولة، و دا في رأيي الطف و أحلى شعور مُمكن يكون في الإنسان عامةً، و هو رقّة القلب، أنك تكون شخص حساس، رهيّف المشاعر، بتشوف و توزن الأمور بـ ميزان الإنسانية، مش جاحد و عند الخصام يبان صعوبه قلبك ، مبتعرفش تكره و تنام و انت ظالم حد ، شخص سوي نفسيًا و أخلاقيًا، سهّل، ليّن، مُتسامح، نقي، أبيض، طيب، لطيف، إنسان يحمل صفات الأنبياء، و في الوقت و العصر إللي إحنا فيه ده، كونك فيك الصفات دي، فا انت كسبت الدُنيا و الأخرة، واللّه فزت فوزًا عظيمًا، زي ما النبي ﷺ قال ؛ "حُرِّمَ على النَّارِ كل هيّنٍ، ليّنٍ، سَهْلٍ، قريبٍ من النَّاس." 💙