كل مره تتكرر

حاجات بسيطه أوي ممكن تخلينا نكرهم ونشيلهم من حياتنا ونبدأ ننساهم
ونكمل حياتنا مش عايزين نحب حد ولا نقرب من حد وفجأه يجي شخص من بين الناس ديه كلها
يعاملنا غير الكل ونحس باهتمامه بينا ،لحد ما فجأة يبطل يهتم نلاقي نفسنا بنجري وراه وبنروح اي حته يكون موجود فيها ، نختلف معاه ، ونخترع حجج عشان نروحلهم. 
وتبدا قصتنا معاه لكن الموضوع ما بيدومش فجأه تلاقيهم بطلوا يهتموا تجاهلوك وحسسوك انك لازم تبعد عنهم. 
وبعد محاربه كبيرة مع النفس انك تفضل معاهم وما تسبهومش ...
تلاقي نفسك تعبت وكرامتك اتهانت وتتاكد انك بتجري وبتسعى على حاجه مش ليك
او حاجه كانت ليك لفترة وخلاص ما بقتش ليك
وترجع التاني الحاجات البسيطه ديه تخلينا نكرهم ونشيلهم من حياتنا ونبدا ننساهم ....

عايزه افضفض

اكتر حاجه تختق انه تكون مش عارف تعبر عن اللي جواك ، مش لاقي من تحكيله عن مواقف حاصله معاك
حد يسمعك حد يديك النصيحه الصح ، حد خايف عليك ، حد مش هسيبك مش هيغدر بيك ولا يبعد عنك
حد فاهمك ، قدامك يعاتبك ومن وراك يدافع عنك ،،،،
ﻷن اكتر حاجه تخنق انه ما تلاقيش الشخص اللي تحكيله ولا تلاقي الصاحب اللي خايف عليك
بالعكس اكتر حد خايف منه هو صاحبك ليغدر بيك او يمكن يحقد عليك ، او في لحظه خصام ينشر كل حاجه
حاجه ، صاحب منتش قادر تحكيله اللي جواك وماسك نفسك بالعافيه عشان ما تحكيش ... ولو رحت في مكان ومش عايز تعرفه تضطر تكدب وتختلق اي حجه
حاجه وحشه انه ما تعرفش تفضفضله ، تفكروا مع بعض ، تعملوا خطط مع بعض وتتفقوا على كل حاجه مع بعض.
بس للأسف مش كل حاجه تتمناها هتلاقيها

نهايه عامله ايه

هو أحنا وصلنا لمرحله أنه لما خلاص الظروف تجبرنا انه نبعد عنهم ، ونعرف انه مش هنعرف نشوفهم زي الأول ولا نتكلم معاهم نضطر انه نخترع أي حاجه تخلينا جنبهم دا حتى يمكن انه نكدب كل دا عشان مش عايزين نسيبهم ولا عايزين نشوفهم او نعدي من جنبهم من غير ما نكلمهم ...
ونقعد نخطط ونرتب ونظبط كل حاجه بس بننسى حاجه مهمه أوي ، النهايه هتكون عامله ايه ؟؟
النهايه لو عرفوا انه كل دا كان مجرد كدبه وانه الهدف من ان اللي احنا عملناه عشان نبقى معاهم مش عشان حاجه تانيه ، النهايه لما ينتهى الموضوع اللي عملناه هنتقرب منهم ازاي تاني ؟
ليه مش عايزين نفهم ونستوعب انه اللي عايزنا في حياته هيحطنا فيها ويهتم بينا ويسأل عنا ويخاف على زعلنا ، ليه علطول احنا اللي نقرب منهم وهما مش عايزين يقربوا ؟؟
والأدهى من دا كله ، هل بعد ما عملنا كل الحاجات ديه هنطلع بفايده ، هيقربولنا مثلا ؟! هيسألوا عنا ؟ هيخافوا علينا زي ما بنخاف عليهم ؟! الأهم هل هيحسوا بينا ويحبونا ؟! أتوقع وإن ما كنتش متاكده انه ﻷ

حاجه عجيبه

فيه طبع غريب أوي
لو بدأت تحب حد وتتعلق بيه وتحصل بينكم مشاكل وغالبيه المشاكل ديه سببها انه عدم اهتمام او تجاهل
او غيره بس ما تقدرش تقول ومن هنا تبدأ من اي الحكايه ...
أي كلمه تتقالك تفهمها غلط واي حاجه تترجمها على انها بزعله
وتفضل في صراع ما بينك وبينهم ، وتفضل تفكر في الموضوع وتكبره وتتعب نفسك
وتقعد تستنى انهم يصالحوك وطبعا دا مش بيحصل ﻷنهم مش فاضيين دا اولا
وعندهم لكل حاجه عملوها سبب وحجه وغالبها انه يا نسيان او انشغال. 
وتضطر بعد ما حرقت دمك وتعبت نفسك على الفاضي تاخدهم على جنب وتتكلم معاهم
طبعا بنعمل كدا ما نكون قعدت نرتب الكلام واستخرت ربنا واتكلمت مع كل الناس على المشكله
واول ما تبدأ تتكلم معاهم اول كلمه تتقالك منهم والله مش زعلانين
وبنعمل كدا عشام طبعا بتخاف انهم زعلانين منك
عشان وقت الخناق كنت بتحكي للناس المواقف اللي حصلت بينكم وكان الغلط منهم عشان يبدأوا يكرهوهم
ولما قالوا انهم مش زعلانين تبدا تسالهم طيب ليه عملتوا كدا وكدا!
يكون ردهم بسيط انه مش كدا ... مشغولين ... نسينا
وتفضل تكمل حديثك معاهم و تحاول تفتح معاهم موضوع وتهزر وتضحك ...
في وسط الحوار دا ممكن تسمع حاجه تسعدك زي انهم يقولوا لك غلاوتك عندهم  :)
وممكن ما تسمعوش بس الكلام معناه كدا
وتخلص الحوار وتمشي وانت فرحان ولما تيجي ترجعلهم بعدين تلاقيهم ردوا عليك واهتموا
هنا يبدأ الغرابه انه لما تشوفهم بيعاملوك كويس
تبقى عايز تتخانق معاهم عايز تفتح حوارات ومواقف معاهم
عايز تبقى شاغل نفسك بيهم وكلامك مع الناس يبقى عنهم
فأنت لا مرتاح وهما بيعاملوك كويس ولا وهما بيعلموك وحش
يا ترى دا انفصام بالشخصيه ولا ايه ؟!