✍ الناس العفوية !!
اللي محدش مصدق إن لسه ليهم وجود ، ... اللي محدش بيصدق عفويتهم ..
الناس دي فعلا بتتظلم كتير ، وبتتعامل بطبيعتها جدا ، وفعلياً مبيفهموش في نظريات المؤامرة ولا حتى الحقد أو الغل أو انهم يخزنوا لحد جواهم رغم ان عندهم قوة تحمل وصبر رهيبة !!
وأه .. آه بيعرفوا يمسحوا الذكريات الوحشة ، وأه عندهم مليون استعداد ينسوا كل المشاكل ويبتدوا معاكم كل يوم صفحة جديدة مقابل العيشه في سلام وراحه نفسية ...
الناس دي أكبر مشاكلها انها لما بتشوف حاجه مبتعجبهاش بيتكلموا في وقتها ، مبيفكروش في النتيجة ، بيتكلموا بدافع الخوف والحب علي علاقتهم باللي حواليهم - لكن - للأسف بتتفهم منهم انها تخطيط وخبث ومؤامرة لتحطيم العلاقة ...
بيسكتوا مش ضعف ، ولا قلة حيلة - لأ- بيسكتوا صدمه من رد الفعل وسوء الفهم وسوء الظن اللي كلامهم بيتاخد بيه ... رد فعلكم بيكون زي حجر تقيل اتركن علي صدورهم وقلوبهم ..
ناس بتتعامل مع أي حد حواليها بطريقة عاديه ، سواء في الواقع أو العالم الإفتراضي ، بيسمعوا من أي حد ولأي حد من باب الإنسانية ، لكن للأسف بيقعوا في مشاكل كتير وبيتفهم تعاملهم في الحالة دي انه اهتمام ، ومش محتاج أقول الاهتمام بيتفهم ايه في الوقت الحالي ... !!
ناس بتدفع ضريبة الثقه خذلان ، تعاملهم محدود آه رغم حبهم للعلاقات والتعارف ، وده للأسف لإن الناس بتشوفهم شخصيات ساذجه وعلي نياتها !!!
الناس دي عايشة في الزمن ده في حالة تقبل للأسوء ، مبقاش يهمهم الناس بتبص عليهم ازاي ، ومبقاش يهمهم ممكن يتفهموا ازاي ، ومهما يقاوحوا ويقولوا خلاص هنتعامل بخبث زي باقي الناس ... هما يدوب كام ساعه مجرد ما بيناموا ويصحوا بيرجعوا زي ماكانوا !!
بالتلقائية !!
والعفويه !!
ومليون حرب نفسيه !!
بس في النهايه أحب اطمنهم بكلمة واحده مختصرة جدا ..
يكفيكم ان ربنا عالم بالنوايا ...
وده كفاية أوي !!
