شعور عابر

الواحد بيقلب فجاه على الناس .. بيقلب لانهم عملوا حاجات تزعل بس مش عايز يبين انه زعلان منهم

بيقلب لانه حاسس انه عايز يتعامل احسن من كدا
وبيفضل الواحد يسيطر على الشعور دا جواه .. لانه عارف انه شعور عابر

وجع القريب

جرح الناس القريبه بيوجع اوي .. مش عشان هما قريبين منك ولا عشان ما توقعتش انهم يعملوا فيك كدا ..
ولا عشان متوقع انهم يراعوا ظروفك .. ولا عشان ما توقعتش ردة الفعل الكبيره اوي على مواقف تافهه ..

لكن بيبقى عشان كنت فاكر ان هما دول ساندك وهما دول اللى هيقفوا معاك لما حد يجي عليك ..
وجرحهم بيسب فيك علامه جواك ومهما حصل بتفتكر اللى عملوه معاك .. حتى لو عدى عليه وقت طويل
وبتبقى حاطط في نفسك ما هما عملوا فيا ومتوقع منهم يعملوا اي حاجه تانيه ..
وتحس بالحسره لما من جواك بقيت مش مهتم بيهم ، مش حاسس انك خايف عليهم زي الاول
لما تسمع عنهم كلام وما تقدرش تدافع عنهم وتكتفي انك تقول يا ريت ما نجبش في سيرة حد مش موجود

وعشان تريح دماغك وقلبك بتتعامل معاهم ولا كأن فيه حاجه .. وبقى اي حاجه بيعملوها عاديه مش بتتاثر بيها ..
بس بتبقى خايف انه مع الوقت هتفقد حبك ليهم .. وهتبرد مشاعرك معاهم زياده ..

لو الزمن يرجع

ساعات كتير الواحد بيبقى واخد قرار انه ما يجريش على الناس اللى بيحبهم اول ما يشوفهم عشان حاسس انه مش مرغوب فيه بينهم
بس بتلاقي نفسك بتجري على المكان الموجودين فيه .. بتحاول تشوفهم من بعيد ومن غير ما يشوفوك
وبعد ما تطمن عليهم ... بيبقى نفسك لو كانوا شافوك .. نفسك تسمع صوتهم .. نفسك تتكلم معاهم ..
لكن احساس انهم مش عايزينك دا بيبقى جواك وهيموتك ... ومحتار ما بين تروح تكلمهم وتقف معاهم ولا تمشي وتكتفي انك شفتهم من بعيد ..

وساعات بتقول لنفسك انا مكتفي انه اكون جنبهم .. لا حاسس منهم باهتمام بس برده مش شايف اهمال .. يعني وجودك مش هيضيف ولا ينقص حاجه بس اهو منك معاهم وخلاص ...

وساعات بيبقى نفسك لو الزمن يرجع بيك وتفضل تتكلم معاهم وتقولهم على كل اللى في قلبك ... تتمنى الوقت يرجع لاوقات كنت معاهم .. عشان عرفت ان حتى المواقف الصعبه اللي كانت بينكم كانت جميله وليها ذكرى حلوة

وساعات من وجع قلبك وانشغالك بيهم علطول بتقول يا ريتني ما عرفتوهم ولا قابلتهم ...


وساعات بتسرح بخيالك بيوم هتكونوا فيه بعض والفرح والسعاده حواليكم وفي كل مكان ..