...على صباح أحلى إنسانه " أنتِ "

.... فتحت عنيا وكنت نايمه على السرير والجو كان برد 

التكيف كان مفتوح والأوضه ضلمه جداً
و البطانيه والملايه كانوا ساقعين 

رحت قايمه من على السرير وبفتح باب الأوضه فلاقيتك

مدياني ضهرك وأنتي قاعده على الكرسي الهزاز 

الكرسي اللى من يوم ما جبتوه ليكي هديه وأنتى

مش عارفه تقعدي على غيره 

بالرغم من أنك رفضتيه بالأول عشان كان غالى .. وأنى أستلفت فلوس عشان أجيبه ليكي
.. بس انتى إلى الآن ما فهمتيش

  أنى أعمل أى حاجه .. بس عشان أشوفك فرحانه 

دخلت الحمام وما حبتش أحسسك أنى صحيت .. بس زي ما بيقولوا قلبك زي " قلب الأم " حسيتي بيا لما دخلت 

وقفتى على البـــاب مستنيه أطلع .. طبعاً أنا عارفه انك واقفه بره على الباب .. لانها باقت عادتك

أنك تعوديني على الدلع .. ولما طلعت شوفت أجمل حاجه فى الدنيا .. شوفتك قدامى .. وماسكالي الفوطه 

أديتيهاني ومعها أبتسامة من اللي بتخليني أتجنن .. و سمعت مِنك احلى كلمه صباح الخير 

بس بتضيفي معاه الأسم اللى بتنادي بيه علطول واللي مش بحبه .. بس بما أنه انتى اللى قلتيه فهو أحلى أسم فى الدنيا ..
أصبح عليكي وأدخل أصلي .. وتقعدي تعدي من قدام باب الأوضه وتشوفي خلصت صلاه ولا لسه .. !!
وبتبقي عماله تعدي وتروحى ... تيجيبي حاجات وترجعى حاجات ..
أخلص صلاه وأرفع أيدي وأبدأ أدعي الدعاء اللى لساني من كتر مأنا بقوله علق معايا

" أن ربنا يخليكي ليا وما يحرمنيش منك أبداً .. وانك تفضلي معايا علطول .. وانه ربنا يطول في عمرك  ..  "

 أقوم من على السجاده و أطلع بره أفطر معاكي فى الجنينه 

الجنينه اللى زرعتيها ورد وريحان ، ولما عيني تيجي على التربيزه .. ألاقي كل اللى في التلاجه محطوط عليها 

أجي أقولك كلمتى المعتاده .. ليه كل دا ؟! 

تردى عليا بالأجابه المعتاده برده ( أصلها باقت أسطوانه متكرره .. كل يوم نفس الكلام  )
وطبعاً إجابتك تكون .. لو ما عملتش الحاجات ديه كلها عشانك ، هأعملها لمين .. ؟!
 نقعد نفطر و تصممي أني أشرب اللبن بالرغم انى مش بحبه أبداً ..

 وتحبي أننا نقعد على المرجيحه .. وأنا بشربه 

ونفضل نتكلم ولما تيجي تتكلمي عن ذكرياتنا .. أقوم أخلص اللبن بسرعه وانا مغصوبه
 ( كله عشانك .. لأني ما أقدرش أرفضلك طلب )

وأروح أقطع ورده بس ما يكونش لونها أحمر .. عشان لاحظت أنك مش بتحبي اللون دا 

هدومك ما فيهاش أى حاجه لونها أحمر .. حتى أكسسوراتك .. ولا أي حاجه في حياتك لونها أحمر
وأديكي الورده .. وأقولك أنك عامله زي الورده ديه .. 

جميله .. ناعمه .. والناس كلها بتحبك .. بس للأسف بيجوا يقطوفيكِ .. ويخلوكِ هديه لاتنين بيحبوا بعض .. وفى الآخر تترمي 

و بيبقى أكتر أنسان حاسس بيكي هو انا !! .. حاسس بقوتك اللى تهد الجبال و تبخر البحور وتكسر الصخور .. 

 وحاسس بضعفك و بالحاجات اللى مكسوره جواكي واللى مش هتقدرى تصلحيها لوحدك .. 

أبص في وشك ألاقي الحزن بدأ يظهر عليكي .. وقتها أسكت .. واحاول اغير الموضوع 
عشان ما أقدرش أشوفك زعلانه أو متضايقه للحظه واحده ، لا بسببي .. ولا بسبب حد تاني 

أروح مغيره الكلام لحاجه بتحبيها أوى .. وأبدأ أوصفلك شكلك وتصرفاتك الغريبه .. 

وانك قصيره .. بس ماشيه مع طولي .. و شعرك الأسود اللى زي الليل واللى ريحته  بتكون زي ريحة النرجس أول ما يفتح
ولا لما تيجي تحطي برفان .. بحس أنك بترشيه كلها عليكي .. مع ان ريحتك أجمل من دونه.. 
ولما تيجي ترجعي شعرك لورا بالطريقه الغريبه اللى بتعمليها .. 

و لما أجى أوريكي أزاي بتمشي .. وأقعد أقلدك وأنتي بتتكلمي واقولك على الحروف اللى بتنطقيها بطريقه غلط ..
وأزاي لما تكوني متضايقه بيبقى عليكي حركات ونظرات عجيبه ..
ولما تكوني زعلانه مني وتردي عليا وأنتى مش عايزة تبصيلي ولا عايزة عينيك تيجي في عيني  ..
ولا لما تقعدي وتحطي رجليك فوق بعض .. وأما بتيجي تأكلي وتقعدي تغسلي كل حاجه قبل ما تستخدميها  .. 

وألقيكي فجأه بتضحكى من قلبك .. وقتها بحس قلبي اتفتح و الضحكه ديه دخلت جواه .. وقفل عليها تانى .. 

بقفل عليها لأني بخاف يجي يوم وما أقدرش أسمعها .. فبحفظها جوا قلبي .. وأول لما أجي أقولك أوصفي أنا عامله أزاي ؟!! 

أصحى من النوم .. وألاقي أنى كنت بحلم ..
أعدل نفسي وأربع رجلي وأضمها جنب بعض .. وبلاقيني بأبتسم ابتسامات طويله ودا كله بسببك لانك كنت معايا باحلى احلامي ...ز 
وبكون زعلانه أني صحيت لأني عارفه ومتاكده من ان اليوم دا عمره ما هييجي 

.. وأرجع أقول لنفسي " يا ريت كل يوم تحتلي أحلامي وتكوني أنتي بطلتها  "