عندما يكون الحب في طفله صغيره

في الفتره الحالية نفسي يكون عندي بنوته صغيره .. 

أقعد أنيمها .. وألعب بيها ومعاها ... 

أناديها كل يوم باسم اللي بحبهم وليهم مكانه عندي .. وأتخيلهم قدامي واعرفهم أن بنتي" اللى هي أهم حاجه بحياتي " اسمها على اسمهم 

وأول ما تضيق عليا الدنيا بمشاكلها احضنها ولما أجي اشم ريحتها احس بعدها إني أسعد أنسانه ، وأن كل مشاكلي هتتحل حتى لو كان مالهاش حل 

أبص في عيناها ويترسم عليا ابتسامه أمل .. مش من جمال عينها و لا لونها ...  لكن من جمال براءتها ونظرتها ، لأن عينيها هي الوحيده اللي هبص فيها كويس ومن غير ما عيني تنزل في الأرض

وأمسك أيديها الصغيره ، وتلفها حولين صوابعي .. عشان أحس وقتها إني بجد مهمه جداً لشخص في الحياه وأني أنا الامان ليه .. 

أشيلها واقعد أغنيلها وأفضل أتمشى بيها بالليل عشان تنام .. وانا حطاها في بطانيتها عشان تنام مدفيه ..لأني نفسي أجرب شعور الاهتمام بحد غير نفسي ..

أسمع ضحكتها اللي ترد جوايا الروح .. وأضحك على ضحكتها بصوت عالي وبضحكه فعلاً حقيقه وصادقه لا مصطنعه ولا كدابه ..

أصحى لحد الفجر وافضل سهرانه عشانها .. وأعرف المعنى الحقيقي للسهر عشان اللي بنحبهم ..

أغسلها هدومها .. عشان أعرف أن الخطأ اللى بعمله محتاج وقت وجهد عشان يختفي ويرجع زي ما كان .. 

أسيبها في الأوضه لوحدها واسمع عياطها عليا .. لأني عايزة اشوف نفسي لما أبعد عن اللي بحبهم وأزاي أنه بيكون أمر صعب .. واعرف أن الدموع اللي بتنزل وقتها هي أصدق الدموع بل أجملها حتى لو كانت قليله أو بتظهر بالليل عشان ما حدش يشوفها أو يعرفها 

أحكيلها كل يوم عن اللى بحبهم .. وأنّي نفسي تشوفهم ويشوفها 

أتمنى كل يوم أنها ما تكبرش .. عشان ما تبعدش عني وتسبني ، زي اللى بنحبهم ... طول ما حبنا مستمر لبكره فهو بيكبر ولما بيكبر أول حاجه بيواجها أنه بيلاقي الظروف بتبعده عن حبيبه وهي ديه الحياه وسنتها .. ان لكل حاجه فتره معينه ، وما فيش حاجه ثابته على حالها ... مش معناه ان الحب هينتهي بس الحقيقه أنه هيقل مع الزمن والظروف والبعد عن العين لحد ما هيجيله يوم وينعدم أو انه يتحول لذكرى سواء مره او حلوه ...

أعلمها أول كلمه في الحياه وهي " بحبك "، لانها أهم كلمه.. وأكون وقتها بتعلم ازاي أن كلمه ديه قويه ومترتب عليها أفعال وقرارات صعبه وأنه أختار الانسان الصح اللي يستحق الكلمه ديه عشان اقولهاله .. 

أعملها طبعي وأعيشها فيه .. عشان اشوف نفسي في حد تاني واقف قدامي ..

أقعد أقولها بحبك .. وما أستناش ردها لأني عارفه أنها مش بتعرف تتكلم ، لأني عايزة أتعلم اقول للي بحبهم انا بحبكم حتى لو هما مش بيحبوني أو حتى بيحبوني ومش هيقدروا يقولوا أنّنا كمان بنحبك 

أعلمها المشي .. ومع اول خطوه تمشيها ، أحس وقتها إني انجزت حاجه كبيره وعظيمه في حياه شخص في الحياه .. واتعلم ان طريق الحب وعر وصعب ولازم اتنين يمشوه مع بعض .. عشان كل واحد يسند التاني لو وقع .. 

حاجات كتير أوي نفسي تكون فيها .. بأختصار نفسي أحس بشعور الحب من جهتين 

جهه المحب & جهه المتحب 

نفسي أعرف اقول كلمه بحبك من غير ما اخاف او اقعد افكر في العواقب اللى هتحصل لو قلتها

نفسي اخرج حُبي للشمس وللناس .. مش افضل مخبياه ، مع إني عارفه أنه واضح وباين للكل

 " لأن اللي مكتوب على الجبيبن لازم تشوفه كل العيون " 

نفسي أتكلم مع اللى بحبهم من غير ما انسى أنا كنت هأقول أيه .. وأرجع أندم على كل كلمه ما قولتهاش 

نفسي أكلمهم وانا باصلهم عشان أعرف هل كلماتي بتأثر فيهم ولا هي بس كلمات من دون تأثير .. 

عايزه أعرف مين بيحبني بجد ... ومين بحبه بجد !!!
فيمكن تجربه ومشاعرالأمومه .. تحسـسني باللــى نفســي فيه