شكراً ‏❤

شكراً لمهندس أنهارده اللي كان بيعمل حاجه على كمبيوتر حد ولما قلتله على حاجه على جهازي الخاص شافها وقالي مش يقدر يعملها لأنها حاجه بترخيص وشكرته على وقته كفايه أهتمامه وأنه شاف فيه ايه ودا مش شغله وفي آخر اليوم بعد ما أغلب الناس مشيت لقيته جيه وعملي الحاجات كلها وقالي على حاجات تانيه أدهالي وهو مش مطالب بكدا خالص .. 

شكراً للراجل اللي قبلناه عند الكارته ولما عرف أنه فيه مشكله جيه وسافر معانا وحللنا المشكله وعزمنا على البلد اللي روحناها ومش سابنا لحد ما ظبطنا كل حاجه ... 

شكراً للمهندس اللي كل شويه يجي ينكش فيا عشان يضايقني و يضّحك فيا ...

شكراً لكل بيبي لعبت معاه ف ضحك معايا و نام في حضني وأتقالي بعد كدا أنه الأطفال لما بتنام في حضن حد غريب مش يعرفوه يعني الشخص دا حنين وأني هكون مامي حنيه جداً ❤❤ 

شكراً لكل حد لما شافني لبست طقم جديد أو غيرت من طريقه لبسي وقالي كلام حلو .. 

شكراً لكل شخص بيعرفك أن الحياه حلوه وأن فيها ناس حلوه جداً .. فيها ناس قلوبها جميله بتساعد غيرها من غير حتى ما تستنى مقابل .. ناس بتراعي العشره وتصونها حتى لو كانت العشره دي ساعات بسيطه مش شرط أيام وسنين بس ساعات كانت فيها ذكريات حلوه أو صعبه بس كنا واقفين في ضهر بعض .. 

شكراً لكل مين شافني ودعالي دعوه حلوه ودموعي نزلت من عيني من جمال الدعوه مع إني علطول عيني بتدمع لما حد بيدعيلي ❤❤ 

شكراً لكل حد حنين وقلبه نقي ..