عايزه احكي لحد

ساعات الواحد بيحصله مواقف صدفه تضايقه وتخلي حاجه في نفسيته ..
وبيبقى نفسه في حد ياخد باله من تصرفاته المتغيره .. وعصبيته الزياده وتركيزه اللي متشتتطول اليوم ..
ويبقى فاهم انه حصل معاك حاجه مغيراك كدا...
ويجي ع آخر اليوم ويسألك ايه اللي حصل ؟!
و يصر عليك انك تحكي حتى لو مش عايز تقوله ..
ولو بردو ما حكتش بيبقى عارف ايه اللي ممكن يضايقك ويبدا يسألك بالتدريج عليهم ...
لحد ما تلاقي نفسك بتقوله اللي حصل بالتفصيل ، بتحكيله عن اللي شفته وبتفسرله نظرات العين اللي تبصتلك ، والحركات العفويه اللي حصلت ..
وتبدأ تحلل كل حاجه حصلتلك وهو يقعد يسمعلك ويركز معاك وبعد ما تخلص يسألك طب تعتقد ليه اتصرفوا كدا ؟!
وتبدأ تطلع اسباب كتير أوي وتلاقي عينيك دمعت وبتعيط ،و حركات إيدك غالبيتها بتشاور على قلبك من غير ما تحس ، عشان اللي بتحكي عنه انسان انت بتحبه وليه مكانه عنده في قلبك ..
ويخلص الكلام بأنك تدعي انه يا ريت ما حصل الموقف ولا جمعتكم الصدفه ولا انك عرفت الانسان دا اساسا وحبيته وخليت في قلبك ليه مكانه ..
ويقوم مطبطب عليك ويقولك ياما هتشوف كتير المهم تبقى قدها ويقولك كلمتين تخليك تبص للجانب المشرق في الحياه ، وتحط راسك على المخده وانت فرحان ان الهم اللي كان جوا قلبك انزاح وتتخيل مواقف جمعاك مع اللي بتحبه وتنام ،،،
طب لو اشخص دا مش موجود تخيل انت كام مره هتنام مهموم ودموعك نازله على خدك والحسره ماليه قلبك أنه حتى مافيش حد تحكيله اللي جواك ويبقى فاهمك