جمله حقيقيه بكل ما تحمله من معاني ..
صديقه عمري ورفيقه دربي من الثانوي كانت بترسملي صوره كاريكاتيريه ليا فكانت راسمه حسنه في دقني فقلتلها بس أنا مش عندي الحسنه دي قالتلي لا موجوده وفعلاً ادتني مرايه وورتهالي ودي كانت اول مره اخد بالي منها وقالتلي ان الحسنه دي مدياني شكل حلو وانها علامه مميزه عندي 😇 من وقتها وانا كل ما ابص في المرايه عيني تيجي على الحسنه دي وأفتكر صاحبتي وأفتكر الكلام الجميل اللي قالته ليا وقتها مع ان القصه عدى عليها عشر سنوات …
حد قالي اني وانا بضحك عندي نُغزه في دقني 😅 وأنا عمري ما خدت بالي ولا حد قالي ان عندي نُغزه وقالي ازاي مش واخدين بالكم دي واضحه اوي بالفعل النُغزه كبيره وباينه وانا بتكلم عادي وبتظهر أكتر لما بضحك .. هو خد باله لانه قالي ركزت في ملامحك وأنتي بتضحكي ❤️
موقف كمان اني بشوف مسلسل ومتعلقه بيه الفتره دي أوي والكل حواليا مستغرب ان القصه مش جديده بس أنا ايه السبب اللي مخليني أتعلق بيه مش عارفه احدد اوي لحد ما في مره كان فيه مشهد البطل بيهدي البطله سلسله مرسوم عليها طائر العنقاء (الطائر معروف عنه قصه أنه بيُولد من رماده) وكان بيقول البطل للبطله لما شافها منهاره في موقف إنه مش متعود يشوفها كدا وانها في كل مره بتقوم من الوقعه والمشاكل اللي بتوقع فيها وان السلسله اللي جابها هي رمز ليها مش كانت هديه عاديه لما اشتراها زي ما قالها لما أدهالها يوم عيد ميلادها ف كان جنبي شخص اللي قالي إنه أنا كمان عامله زي طائر العنقاء حصل مشاكل كتير في السنوات الاخيره معايا ومع ذلك كل مره بقوم منها الحمد لله وبكون أحسن من الاول ، مشاكل ماليش أسباب رئيسيه فيها ومهما حاولت اصلح ما كنتش بوصل لحاجه والمشاكل دي أثرت على كل اللي حواليا من قوتها وشدتها والظلم لللي أتحيط فيه، ف هو شايف إن دا سبب تعلقي بالمسلسل إني شايفه احداثه وقوه البطله فيا وإني زيها في طيبه قلبها ونقائها .. وقفت عند كلمه نقائها لأن الكلمه دي اتقالتي من كذا حد اني نقيه جداً 🤍🤍 و إن عيوني بيبان فيها كل مشاعري بالذات الحب حتى لو كنت بهرب بعيوني علشان بتكسف ف دي لغه الحب عندي ..
احنا بعيون اللي بيحبونا أحلى لانهم بيشاورلنا على حاجات عاديه بس بيخلوا ليها معنى كبير اوي .. زي صوت ضحكتنا ، عيونا اللي بتهرب وقت الحب من الكسوف وحاجات تانيه كتير .. حافظوا على اللي شافوكم بعين مُحبه مختلفه عن باقي الناس ❤️
ليست هناك تعليقات:
إرسال تعليق