أوقات .. ببقى نفسي أسألك أسئله غريبه
أسئله عارفه أنها مالهاش إجابه .. ومالهاش رد
فبقعد ساكته وبكتمها جوايا ..
وأنا بحضر العشاء بالليل .. قلعت الدبله وحطتها في علبه الدهب .. أخاف تقع او تتوسخ
خلصت العشاء .. وبقيت قاعده مستنياك تيجي .. فببص في إيدي لقيت أني ما لبستش الدبله تاني
رحت الأوضه وفتحت علبه الدهب .. وأخدت الدبله ولبستها تاني .. وأفتكرت الأيام قبل ما نتجوز
كنت كل ما أدخل محل دهب مع حد .. أروح أبص على الخواتم والأطقم .. وأقعد أفكر يا ترى شبكتي
هيكون شكلها أيه ؟!! هجيبها دهب أبيض ولا دهب أصفر ..
ولما جيه اليوم .. واتقدمتلي فيه .. طبعاً أنا ما كنتش عارفه أنك جاي
بس أنت كنت عامل حسابك .. وجايب الدبله بتاعتي وبتاعتك ..
و كل لما أفتكر الموقف دا .. اقعد أضحك جامد
أضحك على الدبله اللى كانت تدخل في صوبعين من صوبعي
كان شكلها حلو جداً وشيك .. بس تقريباً أنت كنت جايبها لوحده غيري
ولما لبستها وقعت علطول .. شفتك أنحرجت جامد أنها طلعت واسعه جداً
بس مش هلومك .. لأنك عمرك قبلها ما مسكت أيدي ولا شفت صوابعي
حبيبت تاخدها وتروح تبيعها وتجيب واحده تانيه أصغر .. بس في نفس الوقت
حسيت أنك نفسك أقضي ليلتي انهارده والدبله في أيدي وأيديك ... على أساس نعرف الكل اننا انخطبنا
أخدت الدبله منك .. بعد ما كنت هتاخدها وتغيرها بكره من الراجل ولبستها ..
قلتلك أنى عايزه أنام وهي فى صوباعي أنهارده ..
واخدتها وحطيت ورق صغير فيها .. لحسن تقع .. ولما رحنا للراجل تاني يوم عشان نبيعها ونجيب غيرها
الراجل قعد يضحك .. على أن أمبارح قعد يقولك صوابعها قد أيه ؟!! وأنت قلتله ما أعرفش
راح سألك .. هتعمل ايه هتغريها دلوقتي !!! .. قالته : اه هبيعها ونجيب واحده اصغر
وقعدنا اليوم كله ننقي في دبله تيجي على مقاسي وتكون حلوه .. في الآخر لاقيت واحده كان شكلها غير الكل
وباين أنها معموله لحد مخصوص .. قستها وطلعت على مقاسي .. عجبتنا كلنا .. قلعتها وببص فيها
لاقيت محفور اسم عمر عليها .. استغربت وسألت الراجل عن الاسم ..
ولما عرفت انها كانت لاتنين كانوا ناوين ينخطبوا .. بس حصل ظروف واضطروا أنهم يسيبوا بعض
بعد لما كانوا عاملين الدبل بتاعتهم مخصوص ليهم .. رفضت أننا ناخدها
الراجل استغرب !! .. وكان عايز يعرف سبب انك مش عايز تاخدها وقعد يقنعك
قلتله حاجه .. حسيت وقتها اننا مش هنكمل مع بعض
قلته يا عم انى ما صدقت ارتبط بيها و اربط الحبال بينها وبين امي .. تروح تديني دبله لاتنين سابوا بعض
قعد الراجل يقنعك ان الدبله ما اتلبستش .. ولا لحقوا يتهنوا بينها ..
طبعاً وقتها أنا كنت واقفه .. مش عارفه اقول اى حاجه .. من بعد اللى قلته وانا عرفت اننا ممكن مش هنكمل مع بعض
فأي دبله وخلاص مش هتفرق معايا .. طالما انا عارفه انى هقلعها .. طلعت وقفت بره المحل
والراجل قعد يقنعك ويفهمك .. وفي الآخر طلعت وجبتها معاك
ولبستهالي .. حاولت استفسر ليه جبتها ؟! وقلتلك كنا شوفنا واحده غيرها وخلاص
قلتلي ان كل اللى عايزاه انت هتجيبهولي .. وطالما ان القدر شاء ان اسمه يكون عليها فخلاص ليه ما نجبهاش ؟!
طبعاً أنا عارفه انك مش عايز تقول الحقيقه ولا عايز تفتح الموضوع بتاع الربط بيني وبين أهلك وخصوصاً مامتك
انا كمان ما كنتش عايزه افتحه .. عشان عارفه نهايته ..
وأنا سرحانه وقاعده بفتكر بقيه اليوم .. جرس الباب رن .. وفوقني من سرحاني
رحت فتحتلك الباب .. وكملنا اليوم العادي
بالرغم من اني عايزه أسألك عن الكلام اللى قلته في اليوم دا ..
ليست هناك تعليقات:
إرسال تعليق