السعاده حاجه كبيره أوي .. 

شعور مش سهل نوصفه .. شعور للاسف ساعات ممكن نتخدع فيه ونفتكر  إن دي السعاده ويكون الشعور دا مش سعاده حقيقيه .. 

أيون فيه سعاده مزيفه زي مثلاً شعور ان دا اللي متعود عليه وفاهم ان دا اللي بيسعدك وهو مش كدا ، ممكن مثلاً إنك إنجبرت على وضع وبدأت تقنع نفسك أن هو دا السعاده علشان مافيش غيرها.. 

بس أنا السعاده بالنسبه ليا لما النوم يطير من عينك علشان حاجه هتحصل أو علشان وجود شخص معين في حياتك .. السعاده إنك تكون مش عايز تمشي من المكان اللي انت سعيد فيه عايز كدا تجيب مرتبه سريرك ومكتب مذاكرتك وكل حياتك تفضل في المكان دا اللي موجود فيه الأحداث والأشخاص اللي مدينك طعم السعاده الحقيقيه ... 

السعاده بتبان في الصور بجد .. فيه صوره بتضحك فيها علشان تفتكر اليوم وصوره بتضحك فيها علشان شكلك حلو والمكان جميل وصوره بتضحك فيها علشان يوم مهم وصوره بتضحك فيها من قلبك علشان انت سعيد بجد عينك بتضحك مع وشك وفيها لمعه مختلفه ممكن يكون شكلك متبهدل ومش لابس أحسن حاجه عندك و بتتصور في مكان عادي يمكن حتى على سلم مبنى قديم بس الصوره ظاهر فيها سعاده وحب ♥️... 

السعاده إنك تبدأ تقول وتكتب شعر ، السعاده بتخليك عايز تعمل حاجات مجنونه تمسك ايد اللي بتحبه وتبوسها مع انك عارف ان دا ممكن مش ينفع بس هتموت من جواك وتعملها ♥️ إنك مثلاً عايز تشيل اللي بتحبه وتلف بيه قدام الناس كلها من غير ما تتكسف تعمل كدا او مثلاً إني أكون عايزه أزغرط جامد من فرحتي وسعادتي .. 

السعاده الحقيقيه شعور غريب بتحس بيه مع قلب وشخص واحد بس حتى لو قابلته في حياتك لدقايق محدوده وشعورك مع اي حد بعد كدا مش سعاده حقيقيه...